Mir dichten in Platt

Auf dieser neuen Seite präsentieren wir neue Kreationen unserer Mitglieder. Viel Spaß! Und - ihr könnt alle mitmachen. Texte bitte an den Vorsitzenden Gerhard Schommers unter info@schommers-wein.de schicken.

  1. Corona Pandemie
  2. Dä annere Erlkönig (in St. Aldegunder Mundart)
  3. „DAT CORONA - DAT GIEHT (NET) FOTT!“

Corona Pandemie

Lo es joo ewäile ebbes ousgebroch,

datt erinnert onnen sintflutartije Flooch.

Die ganz Menschheit gett em Ousgang beschrängt

unn ewäile nur noch dahaam en de veer Wänn erimm hängt.

Kaaner well dä Corona Virus honn

unn mier Aahle wäre omm schlemmsde dronn.

Mir solle omm besde gornemie off de Strooße

unn solle uus von Jingere vasorje looße.

Nemmie nächsder wie off 2 Meeder bäinanner stiehn

unn off kaane Fall mie maije giehn.

En jeeler Zäilung kammer lääse,

ma dörft datt gründlisch Hänn wäsche net vagäse,

damed dä Virus, wie ma sääht,

besonders bäi uus Aahle kei Onpack greht.

Eeh äisch ewäile fier die Dier wel gieh,

ääsen äisch dereescht emool en Knoweloch-Zieh,

dann weiß äisch datt noohheer ganz bestimmt,

kaane nägsder wie 2 Meder onn mäisch kimmt.

Wäile hoffenisch, datt mir all die Corona Pandemie,

ob jung oder alt gesund iiwerstieh.

Wenn die Vierschrifte engehall gänn en jeelem Hous,

dann es et med dämm Virus bestemt och flott ous.

Unn gänn dann en China kei Flelermäis mie gääs,

dann woohr datt en einmalisch Pandemie gewääß

unn die Welt hot hoffentlisch geliert,

wat rischtisch es unn watt vakiert.

2020 get ganz sescher, e valore Joohr,

donooh hoffe mer, get alles widder wie et emohl woohr,

mier hädde all iiewerläft, joo dat wär schiien

unn mir kinnde endlisch widder nächsder beinanner giiehn.

Peter Stork, Zell-Kaimt
April 2020

Dä annere Erlkönig (in St. Aldegunder Mundart)

Wer joggt do su spät be Noocht un Gewitter,

datt  es die  Maria met ihrem Pitter.

Die zwä honn ze vill Speck of de Knoche,

denn Maria däät vill ze goat koche.

Dä Pitter moost sich all Noos lang näije Bockse kauwe,

Ä hott gemäant, die aale dären irjendwie ennlauwe

Awwer die Wooch hot wat anneres gesoat,

Maria meckert, awwer see es och net zoat.

Och Maria woa moal zoat unn schlank,

Unn hat ganz enge Kläadcha em Schrank

Dat hot sich geännert – se ess richtisch well,

häit broocht se doch tatsächlich 2 x XL

Deshalb hon die Zwäa sich virgenumme

off a anner Gewicht runner ze kumme.

Müsli essen se, un net Rührei met Speck

unn hoffen, domet gäat vill von dem Iwwergewicht weg.

Vill Bewäjung hott ma inne geroare,

un weg met dem fette Schwäinebroare

Un Pizza kimmt nimmi of de Desch,

dafir gerret öfter moal Fesch.

Suu lauwen die Zwäa jere Daach dorch de Wald,

egal off et warm es orrer kalt.

Zehn Kilo hott schu jerer oofgeholl

Unn die Ääsch von dänne Bockse säin nimmi voll.

Unn da honn se noch wat Wichtijes entdeckt,

Datt Bedürfnis no Sex es ganz fresch offgeweckt.

Und dobee gänn och Kalorie verbrannt,

Heiße Liebe – gett su wat genannt.

Häit nennt ma dat Win-Win-Situation,

un alle zwäa honn wat davon.

Alle erret zor Nachahmung empfohle,

wenn a poar Pinncha runner solle.


Gerhard Schommers

April 2020

„DAT CORONA - DAT GIEHT (NET) FOTT!“

„DAT CORONA - DAT GIEHT (NET) FOTT!“

(Offgeschiewe om 13. April 2020)

Dä Albtraum, dä man net glaawe kann
Fängt Morjens schunn bäim Offstiehn an

Do gess´ de wach
Suh Daach fier Daach
Mich´s vaschloohf die Aue off
Denkst: Wie säin die häit wohl droff
Met demm Corona en da Welt?
Wat krehs´de häit suh all vazellt?

Dann stiehs´de off
Dreggst audomadisch droff
Off dä Knopp vom Radio
Un - wat hiers´de widda do?
„Corona, meine Damen und Herrn
Eine Wende liegt noch fern“

Dann wäschs´de dich
Un michs´ dich feadisch
Setz´d dich zom Morjefrehsteck hin
Bläderst en da Zeidung drin
Wenn de lääst, wat do geschriewe
Wär´s de besser em Bett gebliewe

„Corona liebe Zeitungsleser
Wird auch heute noch nicht besser!“
Doch bes´de schunn mohl offgestann
Michs´d dä Fernsehkasde an
Wat sehs´de do off Bidschärmbreite?
Dat Näijesde von Corona heute

„Hallo lieber Fernsehschauer
Wir machen dich jetzt nochmal schlauer“
Dann gucks´de of däin Schmartphon droff
Do blend´d direkt die Nachricht off
„Corona, heut´ das Tagesthema
Macht immer weiter noch Probleme“

Wie soll dat nur noch wäidagiehn?
Wo gieht dat met demm Corona hin?
Dann schmäiss´de dä Compjuda an
Do is dat „NTV“ grod dran
Gucks´d, wat die zo melle honn
Corona es schuh widda dronn

Suh gieht dat wäida Dach fier Dach
Un jede Morje gest´de wach
Mich´s vaschloohf die Aue off
Denkst: Wie säin die häit wohl droff
Met demm Corona en da Welt?
Wat krehs´de häit suh all vazellt?

Dann stiehs´de off
Dreggst audomadisch droff
Off dä Knopp vom Radio
Un - wat hiers´de häit wohl do?
„Corona, meine Damen und Herrn
Die Wende liegt jetzt nicht mehr fern“

Stadisdikkurve die giehn runner
Un wat fihr´n Wunner
In Deutschland un der ganza Welt
Genn nimmie suviel Fälle gezellt
Om Himmel is en Hoffnungsschimmer
Un jede Daach is et winnija schlimmer

Un eimohl morjens gess´ de wach
Suh on ´nem ganz normale Daach
Mich´s vaschloohf die Aue off
Denkst: „Wie säin esch häit dann droff?“

Hott en schiehne Traum gehott
„DAT CORONA - DAT ES FOTT!“

Jürgen Wirtz

April 2020

  1. Corona Pandemie
  2. Dä annere Erlkönig (in St. Aldegunder Mundart)
  3. „DAT CORONA - DAT GIEHT (NET) FOTT!“